Tmur tieħu ċips u ...

Ħa nibda niddeskrivi t-temp. Kulħadd jaf kif kien illum, bard, u riħ u silġ żgħir (li jgħidulu "hail" bl-Ingliż mhux "snow") u insomma bażikament kienet ilha ġurnata sħiħa l-istess, speċjalment ir-riħ. In-nies ir-riħ drawh, imma malli bdiet traxxax ix-xita, daqshekk għamlu. Panik fit-triq u kulħadd iferfex u jlebbet.

Niekol platt ċips u nivvinta x'qed jingħad fuq it-televixin (għax l-istazzjon kien Tork) ma' sieħbi. Kelli għonqi mdawwar biex nara t-televixin, iżda fl-istess ħin stajt nara mir-rokna ta' għajni x-xellugija; minn taħt il-għajn ħa - la hemm espressjoni apposta. Sadattant ix-xita nieżla gelgul. Il-karozzi jitkellmu bejniethom b'dak il-ħoss ta' raxx huma u għaddejjin mit-triq. Nieħu ċipsa u noqgħod ingerrem fiha.

Kieku xi darba jivvintaw mument fejn tista' tmur lura għalih, immur lura għal dan il-ħin u nieħu filmat ta' dan li ġej, biex nagħmel time lapse. Nara wiċċ jaħbat mal-ħġieġa tal-bieb u nisma' karba ta' uġigħ. Diċ-ċiniża ħabtet, baqgħet dieħla fil-ħġieġa bil-fixla tax-xita. Jista' jkun li ġiet Ċiniża wara li ħabtet mal-ħġieġa? Ma nafx imma ħadet daqqa tal-Ġesù Kristu! Imneħirha ċċattja żgur. Ninfaqgħu bid-daħq; hi biex ma tħosshiex daqshekk skomda, u aħna għax ma flaħniex inżommu.

Qed tordna u togħrok wiċċha "Yes, chickon breast witch chips qend qohh it hurts so much. ahh, yes some soss pleasa too" Jien u ta' miegħi nitnejku u għadna mifqugħa bid-daħq u nifirħu li rajna dan l-avveniment iseħħ fil-ħajja u mhux fuq biċċa film. Żaqqi bdiet tuġgħani, naħseb kabbart six pack infatti. Telqet u baqgħet togħrok wiċċha. Imbagħad waqafna nidħqu.

Sten, sten, fadal! Għadni ngerrem iċ-ċips bil-mod. Ir-ragħad barra beda jinstema' aktar u x-xita titqawwa. Il-ħġieġ triegħed u għamel ħoss ta' sajjetta kbira jew xi ħadd reġa' daħal fil-ħġieġa. Indur u nara xi raġel b'daqna oranġjo jogħrok wiċċu. Il-plakka tad-dwal tal-Milied waqgħet minn fuq il-ħġieġa, il-batteriji nqalgħu u ġew ħdejn saqajja. Uejja, mela qatt ma rajt xi ħaġa hekk isseħħ, u rajtha darbtej' f'temp ta' għaxar minuti?! Imnalla kellu vista ħażina għax kieku kien ikisser nuċċali f'għajnejh. Hekk kien jiġi

Grazzi xita, ili ma nidħaq hekk!

Il-ħajja taf tkun morra

Għandi (Eħe xorta preżent ħa nuża) ħuta Molly u dejjem kont qed naraha titqawwa, tant li kienet qisha qed tegħreq daqskemm kienet qed tiħxin u titqâl. Insomma u għidt li aħjar nixtrilha breeder qabel ma' twelled li għandha u jispiċċaw jittieklu mill-oħrajn. Ridt insalvahom.

Dalgħodu qabel mort l-iskola ttawwalt fl-akwarjum, tfajtilhom xi frak u kienu kollha ħelwin u ferħanin jomogħdu. L-imtaqqla refgħet ġisimha 'l fuq u kielet ukoll. Spiċċajt l-iskola u ddeċidejt li nitla' s'għand tal-ħut u nixtri li kelli bżonn. Meta wasalt id-dar, qiegħda ferħana narma dan il-breeder mal-mejda tal-ikel u nirranġa fih u nwaħħallu dawk li jintredgħu mal-ħġieġa tal-akwarjum. Breeder ħelu u ċkejken. Ridt inżanżnu, għalhekk tlajt fuq u sejjaħt lil ħija biex nagħmluh flimkien. (Iva, ħassejt li kienet group /pair? activity.)

Fittixt il-Molly it-tqila iżda ma sibthiex. Ippruvajt infittex wara l-ftit ħaxix li għandi, iżda kollu ta' xejn. Il-Molly l-irqiqa biss kien hemm. Ħsibtha faqqsithom u ma lħaqthiex, imma le; agħar minn hekk. Insibha wara l-filter, f'wiċċ l-ilma. Mietet. Qas ħaqq it-€2.20 li nfaqt!

L-isfortunata

Dubbiena ddur u ddejjaq lil kulħadd u tara ħafna idejn jixxejru. Poġġiet u ma għadhiex tara idejn jixxejru. F'ħakka t'għajn issib ruħha f'post mudlam, u ftit sekondi wara tara raġġ ta' dawl. Tħoss lil xi ħadd jagħfasha. Bis-swaba' tinġibed il-ġewnaħ ta' din il-povra-ħaqqha dubbiena. Tħoss biċċa minnha tinsteraq.

Imwaddba mal-art fuq mejda kwieta, id-dubbiena taqbeż u toqmos, tipprova ttir, iżda ma tistax. Toqgħod siekta fuq il-mejda, tniżżel ilsienha minn ħalqha u tilgħaq li ssib. Taħsel idejha, u s-saqajn ta' wara. Iddur biex taħsel il-ġwienaħ iżda ġewnaħ nieqes. Tgħolli sieqha 'l fuq forsi tħoss il-ġewnaħ imma għalxejn. Jinsab mejjet mal-art bħal dawk il-ħafna biljetti fuq tal-linja. Mormija u bla użu. Tigranfa bħal wiżgħa ma' ħajt il-mejda u tibqa' waħidha mingħajr ma ddejjaq lil ħadd, għax għandha l-problemi tagħha. Għadha bit-tama li forsi jikbrilha ġewnaħ ieħor. Ma tafx kif il-ġewnaħ sparixxa. Tħossha stramba, xi ħadd neżżgħalha dak li jagħmilha dubbiena. Ma tistax iddejjaq lin-nies aktar. Daqshekk qabżet minn karozza għal oħra. Daqshekk taret aktar f'ħajjitha. Kienet ilha minn mindu kienet dudu tkabbar il-ġwienaħ, iżda ma tistax terġa' tmur lura għal dak id-dudu li xi darba kienet. In-natura ħaditilha dak li xi darba hi stess kienet tatha.

X'int?

Int Mandolina,

taf tkun ħelwa li tgħaxxik,

taf tkun morra li tqarraslek wiċċek,

u taf tkun imdewda li tiddisgustak.

Irrid inqaxxrek.

Ħelu, morr je' mdewwed?

Naf, ħallini!

Mela, qiegħda nistenna moth kbir minn x'imkien, u qed nibża', u qed infittex x'jgħidulha dik li toqtol biha... U ktibt "fly killer" imbagħab sibt li jgħidulha "fly swatter" Issa, dan in-nom "swatter" ġegħelni naħseb! Fakkarni fil-verb "sawwat", u bdejt nistaqsi; "Għandhom x'jaqsmu daw' it-tnej'?"

Naf, ħafna ħafna minnkom se jgħiduli "xiż-żig?" Imma għalija affaxxinanti. Għax fil-lingwistika qrajt li l-verb "fajjar" ġej minn "to fire", għax kien jintuża fi żmien il-gwerra u l-Maltin dawruha f'"fajjar" ... U dawn, għandhom x'jaqsmu naħseb u interessanti ...

U l-moth għadni ma erġajtx rajtu ...

Għal haw',

Maria

Ċikkulata Bajda, qaltlu

Mort nixtri mingħand tal-grocer, u qabel ma tlaqt mid-dar, staqsejt 'l oħti jekk tridx xi ħaġa. Wasalt għand tal-ħanut u ma sibtx milli staqsietni oħti, għalhekk dort fuq is-Sur Grocer u għidtlu "Jogurt taċ-ċikkulata bajda nsiblek?"

"White Chocolate?" Qalli

Tajtu ħarsa, speċità, proset talli taf tittraduċi.

Ħareġ minn wara l-kawnter u beda jqalleb fil-kaxex li kienu għadhom kemm ġewh. "Mela, ċikkulata bajda". Qalli b'kantaliena. Għoġbitek hux, ja puft.

"M'għandix ta, 'qas waħda." Tennieli. Waħda?

Ħadt ieħor mill-oħrajn u ġejt lura d-dar, u l-oħra għadha qas niżlet biex tieħdu; basta xtrajtilha. Ptuħ!

Mingħajr ċavetta

Ħadt birra u tħaddit ma' ħabiba u ħadt il-ħajja bil-kalma, għax hekk jew hekk ma kellix daqstant għaġla. X'ħin sar naqra ħin, inżilna biex naqbdu tal-linja. Ġiet il-42 u jien ferħana għax se twassalni passtejn 'il bogħod mid-dar.

Inżilt minn fuq tal-linja u wasalt quddiem il-bieb ta' mrammti. Filgħodu kont naf li ma ħadtx ċwievet. Ċempilt. Erġajt. Għalxejn. Għamilt telefonata u sirt naf li ommi qiegħda n-naħa l-oħra ta' Malta, u li kieku tkellmet bil-lingwaġġ tiegħi kienet tgħidli hekk: "ħeq, jien u missierek qegħdin hawn, u mhux se noqogħdu nħabblu żobbna għal wiċċek u niġu kmieni. Missek ħadt iċ-ċwievet, l-għoxx!" Xi ħaġa hekk riedet tfisser. Qtajtilha, mhux għax kont irrabjata magħha, imma aktar irrabjata għas-sitwazzjoni. Issa għadhom kemm daqqu l-ħamsa u nofs, anzi fadalli tikka batterija fil-laptop u anzi wkoll, jaqbad l-internet minn wara l-bieb. Ili haw' minn xi l-erbgħa. Xbajt.

X'ħin wasalt kelli bewla taqsam. Dik il-bewla li qabel ma tgħid li wasalt tmur dritt tbulha. Ma stajtx nagħmel hekk. Ippruvajt inżommha u rnexxieli għal xi nofsiegħa. Bdiet taqa' l-kesħa ta' flgħaxija u reġgħet ġietni l-ostra bewla. Imxejtha sal-bandli fejn hemm xi latrina pubblika u striħajt. Indunajt li lwejt dahri fl-istess pożizzjoni ma' ħajt kiesaħ u b'sormi fuq tapit kollu ħmieġ u trab tal-arja u tal-karozzi. Xorta hekk qiegħda issa...

Kif kont fil-ħâra tal-bandli mort mawra sal-Lidl. Xtrajt pakket cookies li qallgħuni wara li ħadt ħamsa wara xulxin, u ftaħt il-pakkett ħelu li xtrajt li jkunu mgeżwra f'karta tħaxwex. Ftaħt waħda. Gerrimtha. Ftaħt oħra. Waqgħet. F'għoxx!

Eħħ, x'jiġrilek fil-ħajja meta ma jkollokx iċ-ċavetta. "Low Battery", Aqqalleċ!

B'rieħet tan-nuqqas ta' ċavetta, lestejt esej li mhux għal għada u għal għada għandi ġiex esejs li għadni qas biss indenjajt ruħi naħseb dwarhom. L-għażż!

Microman !!!

Suppost qed inlesti xi xogħol għal-lezzjoni li ġejja, insejt totalment dwaru. Minflok, niżżilt Microman u spiċċajt nilgħabha. Għamilt tfulija sħiħa nipprova nlesti dil-qaħbeċ logħba, u qatt ma rnexxejt. Qatt mhu tard, mhux hekk?

Xtrajt umbrella b'xejn

Jien u tielgħa fuq tal-linja kienet diġà qed troxx. Fi triqti għal Belt żiedet. Wasalt u kont qiegħda kmieni, kif ikoll mimlija tikek tax-xita mal-ħwejjeġ. Qed nistenna ħdejn Cafè Royale u nara gzuz ta' nies jixtru l-umbrelel. Tħajjart, hekk jew hekk xorta waħda kelli bżonn umbrella.

It-tfajla tal-ħanut ġiet fuqi mill-ewwel biex tbigħ. Staqsejtha liema kienet l-orħos, urietni u qantli "din, two-fifty" għidtilha li rrid waħda u staqsejtha biex tiftaħhieli. Tajtha ħamsa karta, u tatni l-bqija. Staqsejtha għall-irċevuta u qantli "Trid tidħol ġewwa ta' imma. Hawn ħa, ħa ngħidlek, erġa' 'tini l-bqija" Tajtha l-bqija u reġgħet tatni l-5 ewro.

Dħalt ġewwa u qdieni raġel. "Two-fifty ħi". Tajtu l-flus u tani l-bqija, iżda l-irċevuta le. Staqsejtu għall-irċevuta u waqt li qed jitħaddet ma' xi wieħed, ippanċjali €2.50. Qata' l-kont, fetaħ il-cash, u tani €2.50 oħra. Jien u ndaħħal il-bqija ħassejt li ġà għamilt din l-azzjoni, u mumenti wara ntbaħt li tani bqija doppja. L-għoxx! Karma, eh?

Għażiż Sur Google,

kull+ħadd = kulħadd

kemm+xejn = kemxejn

.:

kull+ma' = kulma

Hux? ...

Ħa Majk :>

Jekk - Oliver Friggieri

Jekk tifhem x'jgħidu l-kwiekeb
lill-qamar tul il-lej',
jekk tagħraf minn fejn telaq
is-sħab, fejn sejjer, fej',

jekk tirfes kull mogħdija
u tterraq kullimkien,
jekk tkellem lil kull ħlejqa
li tikber fil-ħolqien,

jekk togħdos fl-ibħra kollha
u tmiss qiegħ l-oċean,
jekk titla' kull muntanja
u titfi kull vulkan,

jekk tifhem lil kull siġra
u tkellem lil kull fjur,
jekk torqod ma' kull dudu
u tqum ma' kull għasfur,

jekk tgħodd in-numri kollha
u taf kull alfabett,
jekk tħott kull teorema
u żżarma kull kunċett,

jekk togħxa b'kull tbissima
u tokrob b'kull uġigħ,
jekk toftoq il-kliem kollu
u ssib is-sens li fih,

jekk taf kif kien il-bidu
u kif se jkun it-tmiem,
jekk taf kull fuq, kull isfel,
kull wara, kull quddiem,

jekk taf għaliex kull għabex
iżelleġ kull żerniq,
jekk taf kemm hija twila,
kemm twila, twila t-triq,

jekk taf għaliex l-iżbalji,
u taf x'inhu perfett,
jekk taf għax serp jitkaxkar
u għax itir farfett,

jekk ittawwalt iżżejjed
fuq xifer il-ġibjun
tal-qalb biex issa ttella'
bis-satal x'hemm midfun,

jekk il-maltemp sikkittu
u lill-irjieħ raqqadt,
jekk l-ilmijiet nixxitfhom
u lin-nirien qabbadt,

jekk fhimt kull mistoqsija
u jekk kull ħalfa ħlift,
u jekk kull rebħa rbaħtha
u jekk kull telfa tlift,

- il-pétali tal-warda
waqgħulek minn idejk,
dan l-univers itektek
inqasam hemm, f'riġlejk.

Il-ħajja mistoqsija
miġbura f'elf għaliex,
u ssirlek poeżija
jekk int ma tweġibhiex.

Ma ħaqqekx, imma ħa!

Għollejtni mas-seba' sema

grazzi tat-tisbita.

Qalbi miksura,

u ħadd ma jista' jħitha.

Xi darba konna nitkellmu,

u issa żewġ stranjieri.

Qalbi miksura,

dak it-tfajjel ħallieni.

Ma rridx lilek, iżda

'l dak li jien ħabbejt.

Qalbi miksura,

minħabba t-tfajjel 'l inti ħbejt.