Il-ħajja marda assurda li toqtlok bil-mod il-mod. Lili qed toqtolni wkoll, u t-tobba jieħdu vantaġġ minnha. Qed nistenna għand l-ispiżjar biex nidħol għand it-tabib. Wasalt l-aħħar waħda, u hemm xi nies oħra jistennew. Iddejjaqt nistenna u qed nara ktejjeb tal-Arriva biex nara x'għandi naqbad tal-linja. Ma nistax nifhem ir-rotot u qed inqabar il-ktieb u ndawru fi tromba.
Sadattant xgħelt l-mp4 u daħħalt il-widna. Il-ħin għaddej imġebbed. Jien qiegħda bil-wieqfa u sieqi l-leminija ttektek u l-leħen ta' ġo fija jwaħwaħ u jħanxer bl-uġigħ. Ma sibt xejn x'nagħmel ħlief nissendika n-nies u nipprova nassumi għal xiex ġew għand it-tabib.
Tifel imbaċċaċ, li minn taħt il-għajn ħsibtu tifla qed jintefħulha r-rummien. Kellu siequ l-leminija mimlija ġrieħi u bil-krozzi. Il-krozzi kienu għand ommu u qed jeħodhomlha biex jilgħab bihom taparsi bis-senter. Għall-ewwel tbissimt imma meta beda jieħu gost li ċarratt ħalqi, beda jagħmilha biex jitqażżeż, u dejjaqni. Meta qam għax kien imisshom huma, zappap, u kellu l-pala ta' siqu milwija. Aċċident. Il-marki kienu ta' xi ħadida jew xi ħaġa li daħlet f'koxxtu, xi ħaġa li tniffed sew. Probabbli ta' karozza jew xi ħaġa li ġiet min-naħa waħda, għax l-uġigħ u l-marki kienu fuq naħa waħda ta' ġismu.
X'ħin qamu, kulħadd iċedi għaż-żewġ postijiet vojta, imma fl-istess ħin kulħadd joqrob lejn is-siġġu għax l-egoiżmu jiekol 'il-bniedem. Wieħed oħxon, ħalla lil mara għadha naqra żgħira, tpoġġi. L-oħxon - testijiet tal-cholesterol u mbarazz li jkollhom nies ħoxnin meta jibdew jixjieħu. Il-mara l-waħidha żżomm żaqqha, forsi tqila, u għalhekk fuq kollox riedet tpoġġi?
Ħarġu li kienu għand it-tabib u l-mara qiegħda tixtri Bisolvon. Qed nistenna l-mara tisgħol. U sogħlot. Ħaħ, ħu gost tiegħem togħma antipatka ma' ħalqek li ddejqek filgħodu, fl-ofsinhar u flgħaxija.
Haw' koppja qegħdin ħdejja, u r-raġel għandu xi erba' karti blu minn dawk il-karti qishom Rizla. Probabbli kemm jimlihomlhom it-tabib biex iġibu koċċ pinnoli b'xejn. Il-mara għandha snienha mfattra, aħjar marret għand dentist.
Ħarġu tal-krozzi, u kien imisshom tal-karti l-blu. Kien hemm helmet mal-art u ppruvajt naqta' ta' min hi. Kien hemm raġel kellu xagħru naħa mqaxxra u kellu toppu. Żaqq mimlija birra, u liebes ikrah, u ħsibt li forsi tiegħu. Sakemm kont qed naħseb fuq il-helmet, ħarġu tal-karti l-blu.
Saru s-sebgħa neqes għoxrin u baqa' jien u raġel imbaċċaċ bil-qargħa. Il-helmet għadha hemm. Qam minn postu, ħa xi mediċina li kien hemm fil-helmet u qed jaqra li jkun hemm fiha. Ħmm, mela mhux ta' dak kienet il-helmet. Għaddew xi għaxar minuti u wasalt biex nidħol, u jien u dieħla l-ispiżjara kienet kollha ferħana għax spiċċatilha ġurnata oħra ta' xogħol.
