Sitwazzjonijiet ħilwa

Dan il-blogg qiegħed hawn għal min ried jibqa' jaqra dan.

Sitwazzjoni #1:

Qiegħda bi trej xorb u waħda bdiet titkellem ma' sħabha "Marelli, kif iżżomhom. Kieku jien kollox inwaqqa'." Ma nindaħalx mill-ewwel għax mhux kulħadd ikollu aptit jisma' waitress titkellem. Però tibqa' tipprova tkun friendly u għidtilha, "Qe, darba waqqajt pinta Cisk fuq wieħed, if it makes you feel any better." U ħabibtha twieġeb "Ħeħeħe, anzi kien raġel, għax ma jgħidlek xejn jarak tfajla." U weġibtha, "Xorta, twaqqa' x-xorb fuqu mhux ħa jieħu gost. Ma qabadx jgħajjat ta jew hekk, imma jiġi regolari." Pawsa. "Actually ma tantx għadu jiġi, ħmm." U dħaqna lkoll flimkien għax fehmu l-implikazzjoni tas-sentenza. Jekk int ma fhimthiex, go fuck a duck.

Sitwazzjoni #2:

Kien hemm kollega qed inaddaf il-ħaġuwa tal-espresso biex jagħmel iktar kafè. Din ikollok bżonn issabbatha maż-żibel jew taqlagħha b'kuċċarina. Normalment tissabbat maż-żibel biex naqilgħuha. Pxx, mingħandu l-ħin juża kuċċarina? Insomma kien hemm mejda naqra 'l bogħod minn fejn kien qed iseħħ dan l-att u jien kont qed niġbrilhom l-ikel. Bdew jistaqsu bejniethom x'kien il-ħoss u minn fejn ġej u rajthom li ma ndunawx x'kien u għidtilhom, "Oh, that's just people banging on the table because they got fed up waiting for their food." U baqgħu ċċassati lejja. Għall-ewwel ma fehmux, mostly għax jien bqajt b'wiċċ serju, imbagħad għamilt *snicker* u għidtilhom, "Aaaa, I'm just pulling your leg, it's the coffee machine." U kellhom sigh of relief imdaħħqa u qaluli "Oh that would be just rude, now wouldn't it? Imagine that." U dħaqna lkoll flimkien.

Sitwazzjoni #3:

Mhux dejjem nipprova nkun il-joker jien. M'ilux kien hemm mejda Spanjoli u kellhom id-daqquqa. Staqsejthom jekk iridux xi ħaġa x'jixorbu u kważi kollha ħadu xi birra u wieħed minnhom qalli "I'm sorry, do you have less beer?" Ma fhimtx mill-ewwel u rġajt għidtlu jirrepeti u qalha b'nofs tbissima mqarqċa, "Less beer. Do you have it?" U weġibtu, "Qeee, no. We only have more beer around here." U dħaqna lkoll flimkien.

Vacancy: Part Time Waitress Wanted

Meta jkollok bżonn il-flus u ma tkunx tista' tagħmel mod ieħor ġieli jkollok iddaħħal subgħak (jew subgħajk – kemm trid) f'sormok, u taħdem ta' waitress, jew waiter – skont jekk għandekx penis jew le. Dawn huma mwejjed regolari li tiltaqa' magħhom xi darba jew oħra meta taħdem hekk, jew jekk tmur tiekol barra u tħobb tosserva. Meta niekol barra jien nipprova ma nkunx asshole bħalma kważi huma dawn l-imwejjed li se nsemmi.

1. Familji. Ħa nibda bihom għax li kieku nista' nkeċċihom barra mir-restorant, dawn ikunu l-ewwel nies. Ġieli jkunu familja waħda imma ġieli jħobbu jġibu r-razza u r-redika kollha u jimlew nofs restorant. It-tfal idellku t-tazez kollha sa punt li ma tkunx tista' taqbad tazza mġiddma b'id waħda għax tiżloqlok. Għajjat. Jagħmlu orkestra bil-frieket u skieken li jwaqqgħu kull għaxar sekondi u ġieli jinkiser xi platt bi żball (wara li jkunu ilhom jilagħbu bih) u tara li ħadd ma weġġa' u tgħidilhom li ma jimpurtax, meta fil-verità tixtieq li weġġa' xi ħadd, mhux b'mod sadist, imma għax mal-ksur ikunu kissrulek is-sentimenti ta' moħħok minn xħin daħlu.

2. Koppji. Leħen whiny, "Table for 2, please." Mennenene! Issellmilhom, u tpoġġihom fuq is-siġġu. Dal-qlalet, li jkunu magħmula għal xulxin ġieli jkunu edukati biżżejjed biex ma jwaqqgħux bżieq mill-bews kollu li jagħtu waqt li jistennew l-ikel. Imma, ħafna drabi jkun hemm minnhom li joqogħdu jixxabbtu u jagħtu bews, jekk mhux fiżikali, b'għajnejhom, minn naħa għall-oħra għax ikunu qed jibżgħu li ħarġu u ltaqgħu mad-dinja ta' barra wara tant jiem imsakkra jaħxu. Meta tmur biex tagħtihom il-platt jaħraq, jibqgħu id f'id fuq il-mejda u wara li tiskuża ruħek għal darba tnejn, u għat-tielet b'leħen bil-herra biex tpoġġi l-platt, jitilqu jdejn xulxin u jkunu se jmutu, tant li jerġgħu jpoġġuhom mal-ġenb. Jista' jkun joqogħdu jieħdu xebgħa ritratti biex meta jieqfu joħorġu flimkien joqogħdu jibku. Ħafna drabi jistaqsuk toqgħod tiħdilhom ritratt u tgħidilhom li mhux problema, meta eħe, problema għax ikollok xebgħa ikel x'toħroġ mill-kċina.

3. Il-kategorija tal-idjoti. Moħħhom fit-teknoloġija. Jistaqsu għal wi-fi password qabel ma jindunaw li għandhom il-ġuħ u jibqgħu sad-diżerta mingħajr ma jlissnu kelma ħlief sentenzi bħal "Illalu, rajtu xi ppostja l-ieħor?" Jew "Ara, mela qegħdin flimkien dawk?" Ġieli ma jkollix aptit nagħtihom il-platt u jkolli aptit inġegħelhom jieklu fuq it-tablet.

4. Il-professjonisti. Jekk tkun taħdem f'restorant posh jiġu ħafna minnhom. Dawn jaħsbu li d-dinja ddur magħhom għax huma tal-flus, u ħaddieħor mhux. Qed nirreferi għal avukati, politiċi, tobba u qanżħiet oħra tas-soċjetà*. Aħjar ma nkomplix ngħid iktar fuqhom għax fil-ħajja jaf niġi bżonnhom.

5. Nies sopranaturali. Dawn huma l-allat li jaħsbu li xħin jidħlu fir-restorant l-ikel se jaqa' mis-sema u jiġi eżatt quddiemhom, għax huma bil-ġuħ u jaraw biss ikel. Probabbli int u sservihom jarawk bħala biċċa koxxa ta' tiġieġa titkellem u fil-fatt ma jagħtux kas l-eżistenza tiegħek bħala individwa umana. Waqt li tkun qed tagħtihom il-platti jippretendu li tista' żżomm lista sħiħa ta' ordnijiet li jridu, u jkunu għadhom kemm qerdu għall-ikel bis-sarkażmu vojt tagħhom. Hawnhekk se nqiegħed ukoll dawk in-nies li jikkumplikaw ordni sħiħa. Se naqa' vojta u ngħid li jordnaw xi ħaġa bħal, "Emm, nista' nieħu l-quattro formaggio imma mingħajr ġobon, u bil-mushrooms?"

6. Studenti/barranin għadhom żgħar. Ma jonfqux ħafna u joqogħdu jsaqsuk fejn jistgħu "We want to partey." Ġieli jistaqsu wkoll għal Strip Clubs u biex tkun edukata u forsi ma jistupraw lil ħadd, tgħidilhom qisek tmur int stess. Il-ġuvintur, ġieli jidħlu mingħajr flokk u kontra qalbek ikollok tgħidilhom biex jilbsu flokk. Meta jkunu tfajliet tkellimhom u tistkerrah lejhom u tgħidilhom li, le ma jistgħux joqogħdu bil-bikini, għax qegħdin f'ħanut u mhux ħdejn il-baħar. Ptuħ!

7. "Parla 'taliano?" Dawn huma dawk il-boloh li jippretendu li kulħadd jitkellem bil-lingwa tagħhom. Jistgħu jkunu Taljani jew minn xi pajjiż ieħor fejn ma jeżistix l-Ingliż. Jien ma niġix f'pajjiżek nistaqsik jekk titkellimx bil-Malti għax m'iniex egoista (għalkemm ġieli tkellimt bil-Malti għax inkun xbajt nipprova niftiehem bl-Ingliż). Nixtieq nistaqsi għalfejn isiefru, imma għalxejn għax ma jifhmunix. Ta' waħda li rrid naqla' lira nwieġeb li nifhem xi ħaġa u jkolli naqla' l-vokabularju li tgħallimt fil-Form 3 "għal meta tmur tiekol f'restorant". Hah, the funny thing is that I've used that vocabulary iktar biex inservi milli biex niekol jien. Ma nafx x'ġara fis-sentenza ta' qabel din. Niskuża ruħi.

8. Table-for-1. Dawn ikunu normalment orrajt, għax jew ikunu tant solitarji li ma jkellmukx u jħalluk bi kwietek jaqraw xi ktieb, jew ikollok konverżazzjoni ħelwa fuq ix-xejn tal-ħajja.

9. Nies orrajt. Din il-kategorija hi għal dawk in-nies li ma jagħmlulekx lejl meqrud u jafu jmorru man-nies. Jiċċajtaw ħelu u meta tiċċajta magħhom tinduna li għandhom sense of humour, jekk tagħfas hawn tkun tista' tara l-esperjenzi li ġieli ġrawli u fuq kollox nuri wkoll li m'iniex waitress antipatka li turi li mxebbgħa mill-ħajja. Dawn jistgħu jkunu familji Maltin, familji barranin, jew mhux familji li jafu jirrispettaw u jagħtu l-ħin biex l-affarijiet isiru sew. Imma, kemm issib minnhom?

Imma m'iniex se ngerger kemm nitqażżeż inservi nies ingrati u maledukati. Li taħdem ta' waitress hu degredanti, staqsi 'l Jason.

*Minħabba li jista' jeżisti mqar wieħed minnhom li ma jkunx bħalhom, qed ninkludi din in-nota biex nuri li ma jistax ikun kollha kemm huma huma hekk.

Qegħdin burgh u ajruplani

Qiegħda waħdi nħares 'l isfel. 'Il fuq mis-sħab, 'il fuq mill-ħsibijiet tiegħi nnifsi. Qabadni l-għatx. Kienu għaddejjin bil-kafejiet u tħajjart nixtri x'nixrob bl-għali fil-għoli fis-sema. Staqsejt għal tonic water u ħriġt  £10 biex ikolli naqra żgħar bqija. Tajtha l-flus u kellha tazza żgħira tal-plastik bħala kexx bil-flejjes fiha. Ma tantx kellha bqija Ingliża. Rajtilha €5 mill-ġodda. Qbiżt mis-sit tiegħi, "If it's easier for you I have €10".  Li ridt infisser b'dik is-sentenza kienet: jekk jogħġbok tini dik il-€5 bħala bqija. "Yeah that'll be mooch better", weġbitni. Ħriġt l-€10 u partatna ġo wiċċ ta' ħdejja. Qed tbagħbas fit-tazza u kienet se taqbad €5 antika u żelqitilha minn bejn subgħajha, u qabdet il-€5 l-ġdida. Kaċing! Eħe, għadni nżomm il-€5 ġodda. (Irreferi għal dan). Irrid insib ħobi...

Għalfejn l-affarijiet fuq l-ajruplan ikunu jiswew ħafna flus?
Għax ikunu m'ogħla s-sema. Ħeeee.

Taqlib l-għajnejn ta' Trademarks

Dan il-blogg hu b'dedika speċjali għal nies, tal-istess età tiegħi li jkolli naqsam l-istess arja magħhom, li meta jitilgħu t-taraġ tal-Università jaħsbu li r-raġġi tax-xemx għaddejja minn bejn il-weraq tas-siġar f'naqra żiffa huma l-flash tal-kameras jiħdulhom ir-ritratti.

Jien m'iniex persuna li nara lili nnifsi bħala waħda li naf nilbes, jew kemm-il ħin għandi naħli filgħodu u kemm-il kisja rtokk għandi nagħmel ma' wiċċi biex nissodisfa lil ta' madwari. Din il-kitba hi jien ngħid fuqkom kollha. Intom il-boloh li narakom madwari bi flokk ta' xi Ralph Lauren jiswa iktar mill-kilwa ta' ġo fikom stess biex tmur ħarġa flgħaxija bih li hemm probabbiltà kbira li se jagħmel kuntatt ma' mqar qatra remettar. Int bil-flokk tal-Fredy Perry li tmur tilgħab il-futbol bih u timlieh kollu terf u għaraq u minn abjad isir kannella.

Biex nasal għall-punt ta' dal-qrid, nixtieq li nibda nara flokkijiet bħal t'haw' isfel għall-bejgħ.

Ma naħsibx li n-nies li jixtru flokkijiet ta' kuljum ta' dawn id-ditti jagħżlu għall-estetika. X'hemm daqshekk sabiħ li jkollok erba' flokkijiet bl-istess stampa; żiemel u raġel fuqu jxejjer lasta? Jew kuruna tar-rant ma' żejża minnhom? Sirt naraha vera redikola li minn stampi li jittellgħu ta' xi avveniment ikun hemm sitta bl-istess marka ta' flokk, biss kuluri differenti. Hi tant redikola li għad naslu fi stat fejn il-maġistrat fil-qorti jaqta' sentenza bħal din: 

"Hu minnu li inti abbużajt waħda taħt l-età, imma liebes suit tal-Bortex, waqt li l-missier tat-tifla abbużata liebes waħda mingħand Marks and Spencer. Jien għalhekk, insibek mhux ħati."

Jew xi headline, "Żagħżugħ jegħreq għax irriffjuta jilbes life-jacket mhux tad-ditta".

Fuq sodda mbiegħda mill-irqad

It-tmienja ta' filgħodu u tista' teight li diġà headli rasi. Ara jien x'jimpurtani mix-xjenza, imma scienceisti minn fennel ostra tiġi ż-żerriegħa tal-bużbież u kemm żmien treet siġra biex tikber sew. Dakinhar dayaqni. Thinkett taħseb fuq l-istess ħaġa — ridt li b'xi mouth jew ieħor nagħlaqlu ħalqu, imma ma stajtx. Kelli nibqa' fil-kamra, nisma' l-laqgħa ma' meetejn persuna oħra. Bqajt nistenna b'għaxqa u wishemx dieħla f'eyenejja mit-tieqa, windowr u nara 'l seeħbi jegħmeż, winkiss inkiss ħriġna 'l barra mil-laqgħa.

Malta will Maltin

Minduda fuq xugaman inħoss ix-xemx iċċappasli l-kulur skur fuq ġismi. Nisma' l-baħar jiċċafċaf ħelu ħelu max-xtajta. Inkun dieħla f'raqda li qed tħeddilni fiha x-xemx. Nisma' bieba ta' karozza tinfetaħ. B'ħanxra, "Ejja 'l haw' u stenniena mhux taqbad tiġri waħdek għax taqa' u tweġġa' ħaqq għal Marija Madonna. Għidtlek stenna, Shanisia! Aqta' x'xebgħa se taqla'! Issa nqiegħdek ħaqq għall-madonċi!"

X'torqod torqod. L-ostra!

Qatgħa qatgħa xagħar

Qed nipprova nsib hairdresser li ma tissendikax (Ħeħeħeħħeħe. Naf), taf taqta' x-xagħar u prezz tajjeb. Dħalt għand hairdresser ġdida li qatt ma mort għandha qabel. Kien hemm tnejn li jaħdmu hemm, u sufan fuq kull nofs maduma. Staqsejtha kemm hi qata' xagħar u weġbitni "Trim iġfieri?" Eh, qatgħa xagħar, Ms. Technicalities. "Trim, ten you rose". Ma ridtx inkun qisni belha u nitlaq 'il barra, għalkemm naf li għaxar Ewri ħafna, meta l-aħħar qatgħa xagħar ġietni b'xejn għax għamiltha jien qabel ma dħalt ninħasel, u fejn immur is-soltu €8.50 Poġġejt bilqiegħda, ma kellha 'l ħadd u bdiet tigrifli l-qargħ—taħsilli xagħri waħda minnhom.

Xugaman imgeżwer ma' xagħri, tnixxef naq'a u se tibda taqtagħli xagħri waħda oħra. Tattoo ma' idha, stampa ta' mqass. Staqsietni kif irridu u għidtilha li l-iktar l-iktar kemm tneħħili l-maħruq u li xorta nkun nista' niġbru toppu. Fetħet l-imqass. Għadha lanqas messitu ma' xagħri, "Inti jaqaw il-kuġina ta' Cliff*?" Bdejna. Kelli nkompli magħha għax inkella jien inkun imprudenti. Ugh. Malta m'hawx daqshekk psikologi għax haw' ħafna salons tal-hairdressers. Naħlef li jiħdulhom ħafna mix-xogħol.

What do you call a psychologist with no patient confidentiality?

A hairdresser.

Imbagħad saqsietni x'qed nagħmel f'ħajti u nejk ieħor li ma kellux x'jaqsam ma' xagħri. Xħin qed tfesfes f'xagħri għidtilha li nixtieq inħaffu naqra. Qantli "Dak bix-xafra nagħmlu imma ta." U jien weġibtha li kollox sew, u mit-tonalità ħassejt li hemm xi flus żejda biex se tużali x-xabla ta' La Valette. Stennejt l-iskumdità tegħlibha, u qantli "Eħe. Emm, dik imbagħad tu you rose iktar ukoll." Għajni x-xellugija bdiet tpetpet. U tpetpet. Tbissimtilha dik id-daħqa falza li hi stess tbissmitli xħin dħalt fil-ħanut waqt li flietli ħwejġi. Għidtilha li kollox sew. Dak il-ħin rajt lili nnifsi hekk quddiem il-mera. Xħin lestiet staqsietni jekk irridx nagħtih naqra blow biex jinxef. Bżajt li jiġi xi Ewrejn oħra u għidtilha li m'hemmx għalfejn għax xorta sejra naħslu.

Ma tissendikax ✘
Ma tiħux għoli ✘
Taf taqta' x-xagħar ✓

*Biddilt isem il-kuġin, kuġijn.

€5 u biskuttini

Kont imġewħa għal xi ħaġa ħelwa u tlaqt nixtri m'għand l-Aroma. Qed nagħżel liem pakket se nieħu. Minn wieħed saru tnejn. Minn tnejn żidt stoċċ ħelu. Qed nistenna u nħares dritt biex ma nżidx aktar... ħalli ma nżidx aktar. (Geddit? No? Ok).

Kien hemm waħda u waqt li qiegħda fil-kju qabżitni. Ħaristilha bl-ikrah imma ma setgħatx tarani bl-antipatija li kienet qed tinfestalha wiċċha, allura qgħadt inħares bl-ikrah lejn xagħarha iswed tuta nipprova nigriżah bir-rabja li kelli. Ħadet Tic Tac mill-imbarazz li jkun hemm fuq kull naħa. Pff Tic Tac, jee għax ħalqek jinten, bħalek! Int tinten! Fucken.. X'taħseb li int? Ġejja taqbiżni. Fffuck you. Ġiet biex tħallas u tefgħet l-imbarazz fuq il-kawnter. Red Bull. Ow, waħda minn dawk int..Qeuħ. Staqsiet għal xi sigaretti u ma kellux. Tal-ħanut qallha "Fajf twenti sevinn." U nara €5 mill-ġodda timxi minn id għall-oħra. Il-ħuġbejn imniżżla jberqu lej' dil-mara għolew 'il fuq bil-ferħ u kxift snieni.

Dal-aħħar qed inġemma' l-five Ewri* kollha li ħarġu ġodda biex imbagħad ikollhom joħorġu oħrajn għax ikunu "mitlufa". U JKUNU KOLLHA TIEGĦI! (Eħe, antiki hemm €7,537,335,100. Sors: Wikipedia. U ġodda ma sibtx kemm hemm imma se jkunu kollha għandi. Naf ukoll li l-flus antiki jkollhom aktar valur mill-ġodda għax ma jkunux għadhom fiċ-ċirkulazzjoni, imma tindaħalx).

Dak il-ħin moħħi ħadem hekk: Mela, dik il-five Euro se tkun minn tal-ewwel fil-kexx, u jien naf li se nonfoq inqas minn five. Naf ukoll li se nħallas b'għoxrin, allura l-bqija probabbilment se tikkonsisti f'karta tal-ħamsa, jiġifieri dik li għadha kemm tat din li qabżitni. U Alla ra li kollox kien sewwa.

*Naf li l-plural ta' Ewro/Euro mhux suppost jeżisti.

Le le, orrajt, dewwimni

Ma nafx kif ċerti nies isibu l-iktar mumenti misħuta biex ikellmuk. Għadni kemm kont qiegħda fix-xawer, bl-ilma jgelgel ma' widnejja u nogħrok xagħri u nisma' "Mar? Int hemm ġew qiegħda?" U biex  nkun prudenti nwieġeb li eħe, hemm xi ħadd, imbagħad jipprova jibda djalogu u jippretendi li nwieġeb lura, jew li nifhem x'inhu jgħid.

Illum kont qiegħda mal-mejda. Huma t-tnejn jieklu u jien niċċassa lejn il-laptop, biex nagħmel naq'a family time. Għamilt nofs siegħa u xħin eżatt se nqum u niftaħ fommi biex ngħid "Tielgħa nagħmel x'ħaġa fuq jien." Yep, mument perfett biex nibda nitkellem magħha fuq xi ħaġa importanti u twila u li Maria m'għandix aptit tisma' fuqha jew lanqas taf biha.

L-agħar meta tkun waħdek id-dar, u tismagħhom jgħajtulek ismek u l-leħen jidwi ma' dar sħiħa. U int twieġeb "Uww?" U terġa' "Uwww?" U terġa' "'QQALMA AW?" U tibqa' tgħajjat sakemm jgħidulek "Haw' qiegħda?" €$%^&*.

Inkun sejra x-xogħol; is-sitta neqes ħamsa u nagħmel ġirja mal-ħin biex f'ħames minuti nispara ngħaddi mill-Wied tas-Swieqi u nkun eżatt fil-ħin. Inkun qed noħroġ il-mutur ngħaġġel, niftaħ kull firroll tal-garaxx li jsakkar għax inkella Iron Man jidħol fil-garaxx u jisraq il-kanarin €5 li hemm fil-gaġġa b'torri ħara u nħaffef nitlaq. "Mar, fejn sejra?" Liebsa l-qmis bajda karti tax-xogħol li domt ngħaddi u nara li ma jkollix tikmixa fuqha li xorta se titkemmixli bil-qagħda fuq il-mutur, u nwieġeb li sejra x-xogħol, bħalma jiġri kull nhar ta' Ġimgħa fis-sitta neqes ħamsa. U jirrispondi "Ix-xogħol?" bl-ikbar sorpriża qisni sibt xogħol ġdid, meta kien? Eh sentejn ilu... Inwieġeb bil-kalma kollha li iva, sejra x-xogħol waqt li nagħlaq il-garaxx. "Ipprova ddumx ta." Għax lin-nies jien ngħidilhom f'liema ħin għandhom joħorġu u jieqfu jieklu, u lin-nies ngħidilhom li l-magna tal-kafè mhix taħdem ħalli ma jdumux iktar, u ngħidilhom li għandi n-ngħas u rrid immur nara kif se nqum għada biex inqum nistudja xi ħaġa. Insellem ċaw, u jgħidli "Bless. Isma' ħa... Titlaqx għalissa, idħol waħda ħa nkellmek ħalli ma noqgħodx ngħajjat..."

Nemmen li dan-nies qed jikkonvertuni billi jġagħaluni noħloq Alla biex inkun nista' nidgħi bih!

Stejra mhux solvuta

Meta xi tliet snin ilu kont naħdem ta' waitress (oh wait, I still do), kien hemm xi ħaddiema barranin jaħdmu miegħi. L-imgħallem kien qed jgħidli fuq kif għandi nagħmel xogħli, fuq il-ħaddiema u fuq in-nies li jiġu jieklu għandna. Niftakar kien hemm wieħed jaħdem magħna u kont narah wieħed jidher li jrid jagħmilha tal-bully. L-imgħallem kien qed jitkellem fuqu u qalli "Dak /seɾp/* ta'!" U jien dħaqtlu dakinhar u ppruvajt inwieġeb b'reazzjoni b'wiċċi. U bqajt noqgħod naqra 'l bogħod minn dil-persuna li kellimni fuqha l-imgħallem għax bdejt ngħid li dak serp, jiġifieri ħażen. Is-serp li jissemma' fil-Bibbja. Is-serp b'ilsienu ħażin. Is-serp bil-metafori kollha li jġib miegħu. 

Xi sena wara kont qiegħda f'xi lezzjoni tal-lingwistika fuq l-omofoni u l-lettur ġab l-eżempju ta' serp u serb. U dak il-ħin minn qiegħ moħħi reġgħet ġiet dik il-ġrajja. Għadni nistaqsi sal-lum jekk riedx vera jgħidli li t-tifel kien serp għax kien kiesaħ u jfittex il-ġlied, jew sempliċiment riedx jgħidli n-nazzjonalità tiegħu. It-tonalità ta' "Dak Serb/serp ta'!" setgħet tingħad b'ċertu mod li, għalkemm it-tifel jidher li jaf jitkellem il-Malti, mhux Malti imma ġej mis-Serbja. Imma fl-istess ħin ried jgħidli, biex noqgħod attenta minnu.  U għadha kemm reġgħet ħeġġet titfeġġ dil-ġrajja f'moħħi għax għad għandi l-ktieb ta' Vella Gera li għadni ma spiċċajtx. Shame on you!

*Ma nafx jekk hux hekk bl-IPA. I really couldn't give a shit.

L-imkejjen ta' Places

Lesta mix-xogħol. Ir-rutina tas-soltu ta' wara x-xogħol. Il-ħarġa insignifikanti ta' Paċevill wara lejl ta' għeja u nies jeqirdu għall-ikel. B'riħa ta' Tandoori mweħħla mal-ħwejjeġ u mal-basla ta' xagħri mmur inħallatha mar-riħa ta' sigaretti u arja mniġġsa bir-remettar f'xi klabb. Nibgħat nistaqsi fejn qiegħda l-merħla ta' Bendu u jgħiduli li Places. Nasal u nara l-istess uċuħ li kont għadni kemm rajt ftit sigħat qabel. Dħalt u rassa tad-dimonji tqanpinni minn naħa għal oħra. Nimbotta. Żulu min-nofs!

Ninduna li ma' kull ħarsa nara persuna li nkun rajt friska friska l-Università. Kont qisni qiegħda quad bil-lejl. Ma nafx jekk l-Università tiġix Paċevill bi nhar jew Paċevill jiġix l-Università bil-lejl. X'toqba u kruha ta' pajjiż. Gallinar tiġieġ jagħsdu fl-istess ħmieġ, innittfu lil xulxin. Nieklu informazzjoni. L-istess informazzjoni biex suppost nitilgħu fis-soċjetà meta xejn m'għad għandu l-istess valur u kulħadd jista' jiġi ppasturizzat fl-istess skutella.

Il-president ta' xi għaqda jitgħannaq ma' xi qaħba li kienet tiġi miegħi skola. L-istess waħda li meta kont għadni belha nipprova nsellem, kienet twieġeb billi ddawwar wiċċha u tindifen fin-nefħa li saret. Iżda meta jasal il-jum għal biex tilgħaq in-nies, inkun waħda minn dawk il-persuni li toħroġli lsienha lesta biex tilgħaq vot mal-ponta ta' lsienha u jien ngerrixha minn ma' saqajja bħalma ngerrex id-dubbien iweħħel mal-għaraq ta' saqajja fis-sajf. Nidħqilha, mhux bi tbissima imma b'daħq fil-wiċċ immermer.

Veduta ta' boloh jiżfnu. Fuq naħa l-ħamiem tal-SDM jifirħu bin-naqra frak ta' ħobż li sabu, fuq l-oħra l-imnikkta tal-Pulse jiżfnu mad-DJ. F'għoxx ix-xogħol, x'telqa għandi. Aħjar qiegħda xi mkien ieħor. Aħjar sħabi ma ddeċidewx li jiġu haw'. Aħjar tlaqt norqod, noħlom ix-xejn ta' dlam il-mistrieħ. Imbagħad jiġu jgħidulek tintegra fl-Università? Ġieli rajt u ħarist fiss fiss f'għajnejn in-nies li jidhru u li jattendu l-Università? Jiddieħqu bihom infushom, ma jafux ikunu persuna sinċiera waħda. Le!

 Jien ħaxxej. Jien opportunist. Jien ġakbin. Jien faċċol. Jien qed nuża dit-tfajla biex ngħolli s-self esteem. Jien inkellem lil dal-ġuvni għax jaf in-nies. Nofs sħabi li għandi huma sħabi għax nagħtihom l-invajts b'xejn għall-parties. Naf li dan iridni u nibqa' nkellmu taparsi interessata fih, l-aqwa li hemm xi ħadd iridni. Ġieli jkolli aptit intih għat-tfajla ta' sieħbi. Għadni m'iniex komdu naċċetta l-fatt li jien gay u li jogħġobni sieħbi. Jien m'għandix idea kif dħalt l-Università. Jien nippreferi nkun haw' milli d-dar b'xebgħa ġlied. Erba' snin ilu kont inkun White Arrow niġbed. Jien għandi kors li ma nafx fejn sejra bih. Jien ferħan fid-dwejjaq l'għandi. "Jien ħafna nies / u jien bniedem wieħed."

Tuba xtrat tubu

Mela lbieraħ flgħaxija waqt li qed nissortja xi imbarazz, telaq it-tubu u beda jpetpet. Kien id-dlam, jien għajjiena, u l-ħin jagħfas biex fl-aħħar nidħol norqod. Xgħelt il-lampa ta' fuq rasi ħdejn is-sodda, u dħalt norqod. Dalgħodu 'qas biss xgħelt il-kamra. Bażikament ma kellix bżonn nixgħel, għax fit-tmienja u nofs ta' filgħodu mhux ħin in-nies u xorta kont għadni rieqda jien u nilbes. Ippakkjajt u tlaqt għal-lesson tad-9.

Wasalt lura d-dar. Għamilt naq'a spagetti, kiltu u tlajt fuq f'kamarti. Xgħelt. Xegħel, intefa', xegħel intefa'. Petpet. Oh, fuck me.  Ftakart li lbieraħ flgħaxija mar it-tubu. Inżilt isfel, ġibt sellum, qlajt l-istarter, qlajt it-tubu u mort għand taż-żebgħa. Qed nistenna wara raġel, u tal-ħanut ħareġ mill-ħanut iġiblu xi xaħx u sadattant ir-raġel tax-xaħx kellu bil-fors jibda konverżazzjoni miegħi... "Dak, dak taf għala jinqata' hux? Għax toqgħod titfih u tixegħlu." Qbadtni, kemm nieħu gost nitfih u nixegħlu, istja! X'lussu noqgħod nixgħel u nitfi t-tubu. Sħabi fil-fatt kienu sejrin jixorbu l-ġimgħa d-dieħla u se ngħidilhom li ma nistax għax se noqgħod nixgħel u nitfi t-tubu d-dar. Aħħħ. Weġibtu li fil-kamra jkun u ħafna drabi mixgħul. "Eh, mela għamlu żmienu. Ħeħ. Ħeħ." What a freakin' idiot! Xaħx kemm għandu. Ġie lura tal-ħanut u l-għoxx induna li tah ftit. Dan tax-xaħx qal lil tal-ħanut biex jaqdi lili l-ewwel. Yay!

Għidtlu li ma nafx jekk marx mill-istarter jew mit-tubu u qalli biex xorta nagħmel starter ġdid. "Tal-erba' dak?" U mar 'il ġewwa tal-ħanut.  Ġie lura, "eh stenn, tal-ħamsa dak." U reġa' mar. U reġa' ġie. Tax-xaħx jifhem f'kollox u qed igedwed xi ħaġa fuq jekk hux tal-erba' jew tal-ħamsa. Ħallastu u tlaqt 'l hemm. Wasalt id-dar, deffist l-istarter il-ġdid fit-toqba, ibbilanċjajt lili nnifsi fuq is-sellum imżellaq fuq it-tapit u permezz tal-qsurija tiegħi rnexxieli nwaħħal it-tubu. Ma kontx naf x'se nagħmel bl-istarter l-ieħor għax kien jaf għadu tajjeb u infatti hu, so tfajtu fit-toqba l-oħra fejn ma kellix starter, imma kien hemm tubu. Xgħelt, u xegħlu ż-żewġ tubi. Bażikament stajt ma xtrajt xejn u nbiddel l-istarter fit-toqba l-oħra. X'jien tuba! Meh, issa kull darba li nixgħel il-kamra jkunu qishom qed jinfetħu l-bibien tas-sema. 

Voodoo child

Xahar ilu għaddejt minn parking ta' Baystreet u waqgħet il-grada fuq rasi. Hemm kamera tħares eżatt lejn il-grada, jiġifieri hemm irrekordjat jien naqla' daqqa fuq rasi u mbagħad fuq ħaddi b'din il-ħadida. Ma tajtx kas daqshekk ta' dan l-avveniment f'ħajti u għidt li kien traskuraġni tiegħi nnifsi, però ili nipprova nirkupra minn riħ mill-bidu tax-xitwa. Jitlaq wieħed u naqbad ieħor. Dan jista' jkun ukoll traskuraġni tiegħi nnifsi pereżempju meta nixrob wara ħaddieħor jew nejk hekk, imma xorta.

Fil-weekend tal-elezzjoni kont ma niflaħx tant li ma stajtx noħroġ, għalkemm ġejt imġiegħla mmur nivvota bil-mard li kelli. Dal-weekend bdew jerġgħu jittikawni s-snien tal-għaqal u waħda minnhom kibret u daqt tkun lesta biex tibda titħassar u noqgħod immur nimlieha. Bin-nuqqas ta' spazju li ġabu f'ħalqi s-snien ġodda, qed nigdem ħafna lsieni u bħalissa qisni ħadt ħot ċoklitt u nstmatt għal xi erbat ijiem wara xulxin. It-Tlieta li għadda għawwiġt is-suba' l-kbir ta' idi l-leminija u fekkiktu. Illum mort il-Polyclinic nara jekk ksirtux, għax intefaħ. Nixtieq inkun naf minn fejn ġibt din is-seħta kollha għax apparti din il-qerda fiżikali kollha li ġrali f'inqas minn ġimgħa, kelli nistenna għal nofs siegħa sħiħa fil-waiting room tal-Polyclinic tal-gżira ma' żewġt ixjuħ li ma waqfux jgħidu u jitkellmu jgħajtu u jippruvaw idaħħluni fil-konverżazzzjoni insignifikanti fuq kemm se jdumu t-tobba meta huma m'għandhom xejn x'jagħmlu f'ħajjithom ħlief fl-aħħar mill-aħħar jistennew il-mewt. Tant kemm kienu antipatki dax-xjuħ li f'kamra kbira, qagħdu bilqiegħda faċċata ta' xulxin, erba' passi 'l bogħod minn xulxin biex jgħajtu aktar u jitkellmu qishom ġiex ċawliet.

Insomma, bilkemm nista' nistartja mutur, aħseb wara nsuq, 'qas nista' nibgħat messaġġ sura, jew nilgħab squash. Ma nistax inqaxxar kiwi. Diffiċli noħroġ il-laptop u noħorġu mill-basket. Ma nistax nagħlaq il-ġakketta sew. Ingwanti ma nistax nilbes sew. Indum biex inneħħi l-bra u rrid nuża l-pala ta' idi kollha biex ninża' l-qalziet ħa nbul; bażikament ma nistax nilbes qliezet bil-buttuni għax nilħaq inbul taħti sakemm inneħħi kollox. U issa naraw kif se ninħasel u ningħorok mingħajr ma naqa', take 2. Xejn, ma nafx! Jew tort tal-lejper jew hemm pupu xi mkien jittaqqab u jivuduwjawni.

Boloh isuqu

Illum mort sa B'kara u pparkjajt u qed indaħħal il-ħelmitt u nneħħi l-ingwanti u xebgħa nejk fil-mutur. Karozza li pparkjajt ħdejha paqpqet fil-vojt. Ħarist u kien hemm mara xiħa minn daw' li ma nafx għala jafdawlhom stering f'idejhom u reġgħet paqpqet. Mort ħdejha u stennejtha biex nara xiż-żobb trid. "Tipparkjax hemm ħi, għax għax meta se niġi biex noħroġ jekk nolqtok mhux tort tiegħi." I'm sorry, liema vers tal-liġi qed tikkwotali? 'Jekk nolqtok mhux tort tiegħi.' What the fuck.

Din kellha Chevrolet tidher għadha ġdida u jien għandi biċċa mutur. Taħseb li se tagħmel ħsara lili aktar milli se tagħmel lilek jekk tolqotni? Belha.

Għidtilha li warajha kellha fejn tirriversja u setgħet toħroġ faċilment jekk taf tuża r-rivers. Ħarset mir-'review mirror' biex turi kemm hi pro u Schumacher qantli, "Imma resqu iktar 'il quddiem hux." Iktar 'il quddiem kont niġi f'rampa, issa ħalliha li r-rampa ma tagħmilx sens għax il-bankina dejqa u ma jistax jgħaddi pushchair 'ħseb wara wheelchair, imma xorta ma ridtx inkun ostaklu għal min ikollu bżonn ir-rampa b'xi mod. Għollejt il-mutur u ressaqtu rixa ibgħad. Għamilt sieqi l-leminija ħdejn ir-rota tal-mutur u fettaqt lili nnifsi sal-bumper tal-karozza tagħha. Urejt l-ispazju kbir b'idejja qisni l-għoxx f'main road u għidtilha "Hekk biżżejjed? Taħseb li taf toħroġ mill-parking hekk?"

Kemm inħobbu dal-pajjiż!

Għandi l-ġuħ, 'tuni x'niekol

Mort niċċelebra xi ħaġa ta' xi partit, bazikament kien political party, għax kien party bi bnadar ta' partit. Naqbeż u naqbeż. Niftakar fi żmien tfuliti meta missieri kien jeħodni għall-mass meetings li ma servew ta' xejn għax m'għandix ħajra li nivvotta. Imma insomma...

Iddeċidejt li kien sar il-ħin biex nidħol norqod mal-mara u t-tfal. X'mara u tfal? Ma nafx, qed inparla vujtaġni. Qed nimxiha għall-parking. Vuttutum,. Għaddejt minn quddiem iċ-Champs ta' Paċevill. Kellha kollox għadu mimli. Il-ustja, ħaġa minn kollox. Ipparkjajt bl-addoċċ u mort biex nixxi. Pizza? Pizza tajba! Kelli għaxar ewro u farraktha għal naq'a ewro ta' pizza. Gotta have it. Erġajt qiegħda ħdejn il-mutur, ferħana bil-pizza sħuna f'idi. Aħħħ. Ilbist l-ingwanti, ilbist ħaġa ma' wiċċi biex ma nħossx il-bard,  u l-helmet, u headphones u bil-pizza fuq irkoppti. Xgħelt. Vuttutumm. Indunajt li kelli bżonn inneħħi l-ostra ħaġa minn ma' ħalqi biex inkun nista' niekol. Ħalqi diġà qed jimtela kollu bżieq biex niekol dil-ostra pizza. Aħħħ. Margerita rħisa lesta għal ħalqi. Ġej l-eroplejn....

Id waħda fuq il-gass, l-oħra fuq il-pizza, pizza li tlaqt biex inneħħi dil-ħaġa minn ma' ħalqi ħa nibda niekol. Neħħejtha minn ma' ħalqi, u għidt "meh, mhux se nħoss bard għax ikolli s-sħana ta' dil-pizza tant bnina li qed tistennieni nikolha!" Qgħedt il-pizza fuq l-irkoppa u neħħejt il-ħaġa minn ma' ħalqi. Il-pizza waqgħet. Diżastru. Diżgrazzja. Diżunur lill-pizez kollha tad-dinja. Qiegħda fir-roundabout ta' ħdej' il-BOV kważi fejn Beer Garden u dortha kollha biex inġib il-pizza. Bieb għoxxi, se nikolha! Fis-sakra li kelli u li għandi nara karta taċ-Champs ittir. Ħeeħħeħe, karta taċ-Champs, aħħ bħall-pizza li se niekol. Qmmm. Nirrealizza li l-karta kienet tal-borża tal-pizza tiegħi. Nagħmel U-turn u nara l-pizza rasha 'l isfel mal-art. Niket u dwejjaq li xejn xejn ma seta' jnessi ħlief pizza oħra li ma kellix aptit nerġa' mmur nixtri.

L-iktar ħaġa li kelli bżonn apparti niekol, kienet li npixxi; għalkemm kont għadni kemm inpixxi. Wasalt id-dar, u tlajt dritt niġri nbul. U issa ninsab fuq is-sodda naħseb u nitnikket fuq il-pizza li ħlejt fix-xejn. Aħjar qiegħda f'ħalqi, bejp. Inħobbok! Illejla noħlom bik li qed nilgħaq iż-żejt li tħalli ma' subgħajja u nieklok biċċa biċċa. Biż-żebbuġ qares li ma tantx jogħġobni imma qed nixxennaq għalih, bil-ġobon imdewweb fuq iz-zalza ħamra ta' żaqqek, u b'dak iż-żejt ileqq li jsebbaħħlek wiċċek u jagħmlek tant attraenti...

Min jorqod bil-ġuħ, joħlom bil-pizza.

Il-lift u r-remettar

Suppost ngħid "skużi, ir-remettar"? Le. Remettar. Waħdu. Remettar vjola. Se nibda din l-istorja billi ngħid il-kelma "remettar" għax dak rajt fil-lift. Ma kienx hemm "skużi" mal-istampa tar-remettar ikkulurit, ilwien sbieħ mar-rokna tal-lift.

Ħsibt biex immur d-dar u kelli l-vettura pparkjata Baystreet. Ridt nitla' fil-lift. Għafast u qed nistenna liem jinżel jew jitla' l-ewwel. Bħalissa qed taħseb, "ok, sabet remettar fil-lift, proset", imma mhux biss. Ma ridtx nitla' f'lift kollu remettar, allura qed nistenna l-lift l-ieħor u ma wasal qatt. Ma domtx eternità nistennieh, imma ma wasalx f'ħin disponibbli għalija. Qbadt u tlajt it-taraġ. Flgħaxija it-taraġ aħħari jagħlquh bi grada. Kelli nistenna l-lift xorta waħda. Qed nistenna u għafasthom it-tnejn f'daqqa. Reġa' ġie dak il-lewn vjola f'rokna u l-lift l-ieħor ma ġiex. Ma stajtx ma nitlax għax ma kellix aptit nitla' telgħa wieqfa li qabel ma nitlagħha jkolli ninżel is-sulari li tlajt.

Ħadt nifs qawwi.

'Il ġewwa. Kbir. Nifs li jservini għal dejjem, jew hekk ħsibt.

Dħalt niġri fil-lift għafast in-numru 3 u għafast biex jingħalaq, erġajt għafast, bħallikieku se jgħaġġel iktar għax tgħafsu. In-nifs li ħadt qabel ma serviex. Ngħolli wiċċi ' fuq biex ma nxommx, jew aħjar għamilt 'face lift'. Qed naqta' nifsi. Nieħu nifsijiet ċkejkna 'l barra minn dak in-nifs ta' qabel. Spiċċali. Kelli nieħu nifs 'il ġewwa, b'wiċċi ġol-flokk. Infetaħ il-lift għat-tielet sular u ħadt nifs 'il barra qisni għadni kemm irremettajt jien. Qed jinfetaħ il-bieb u nara l-ħassiel mhux Malti (iswed, il-ħassiel kien iswed) u qabad juża l-ftit lingwa Maltija li tgħallem f'daw' il-ftit snin li ilu jgħix haw', "Il-liba Madonna, xiż-żobb you made here, eh? Melaaaaaa..."

Ħasibni li jien qlajtha kollha hemm ġew. X'ħasibni? Unicorn, 'qqulleċċ? Remettar vjola. B'sorpriża l-vjola vera kien iddettaljat sabiħ, qisu wieħed mill-kuluri tal-qawsalla. Jien b'nifsi maqtugħ minħabba r-riħa, ħadt gost li ħriġt, u l-ħassiel rani b'nifsi maqtugħ ħasibni li ili naqla' fil-lift tliet sulari sħaħ u għalhekk ninsab bla nifs. Skużajt ruħi, u qisni komplejt nuri li jien kont li qlajt. U skużajt ruħi li mhux jien kont u l-ħassiel imfixkel. U jien komplejt "Yeah, I know, man. It wasn't me. I know it looks like it was me, but it wasn't me."

U kompla jitkellem ħażin bid-deskrizzjonijiet tant sbieħ li ħolqu l-Maltin. X'kultura!

Abjad lift? VJOLA LIFT!

Etimoloġija għall-boloh

Ġesù u Johnnie Walker

Fil-vaganzi tal-Milied li għadda kien haw' patri d-dar, ħabib tal-familja. Mort inġib xi affarijiet mill-mutur u kien qiegħed fil-garaxx jitkellem ma' missieri. Sellimtlu, u staqsa kif jien. Il-patri se nsemmuh Ġesù, għax hekk jew hekk jirrappreżenta lil Ġesù.

Ġesù: Kif aħna, Marì? Ilna ma narawk, eh!
Jien: Orrajt orrajt. Kollox sew? Il-Milied it-tajjeb, father.
Ġesù: Grazzi, grazzi. Ġejt nawguralek Milied hieni jien ukoll, għax m'għadekx tiġi tarana int; insejtna. Warrabtu lil Alla minn ħajtek, għax għandek ħabib ġdid issa...
Jien: Mela, mela...(pawsa) X'ħabib?
Ġesù: Uu, il-ħabib hux. Walker.

Ommi tħares lejja biex tara min hu l-ħabib ġdid li kien qed jitkellem fuqu, u jien aktar konfuża għax ma nafx għal xiex qed jirreferi.

Jien: Walker? Xiex, Walker Texas Ranger?
Ġesù: Lee, ħeħe. Johnnie Walker hux, il-whiskey.

Ommi tħares bl-ikrah. Jien inqarras wiċċi għax ma tantx jogħġobni l-whiskey u malajr kont se nwieġbu, "Le, iktar Tequila u Vodka nieħu ssoltu." Imma gdimt ilsieni, komplejt nidħaq miegħu u dawwart id-diskors fuq x'hemm lest għall-ikel. Ħadt l-affarijiet mill-mutur u tlajt 'il fuq.

Dakinhar flgħaxija, ħriġt ma' sħabi u morna sa Charles'. Tal-bar staqsieni x'ridt. Weġibt "Agħmilli Johnnie Walker."

Meet and Meat

Nistenna u niekol. Jien kelli wrap u l-oħrajn qed jistennew xi te jew kafè isfel. Niċċassa u niekol ir-wrap. Ikun hemm dat-tfajjel li dejjem tarah idur mal-Università u ssegwih b'għajnejk hu u jimxi minn ħdejk. Tarah il-librerija, tarah għaddej għall-canteen, u dejjem tieħu nifs b'qawwa 'il ġewwa u 'l barra ma' kull pass li jagħmel.

Qiegħda bilqiegħda fuq il-mejda f'ħanut fejn ir-wraps huma wisq għoljin għall-ħajja ta' student u li tħallas għall-VAT li qatt ma jagħtuk irċevuta tiegħu. Jerġa' jidher dal-proxxmu, l-istess wieħed li tara kważi kuljum li ma tafx x'jismu u ma tafx min hu, imma tafu. Tħares lejh u tissendikah. Tarah imiss dik it-troffa xagħar minn fuq ġbinu u jitbissem. Titpaxxa bix-xena u r-wrap tinżillek għasel. Jitilgħu sħabek bit-te u l-kafè li xtraw u jpoġġu. Tinduna li jkunu qed ikellmuk u int tkun aljenata. Issikkithom u tibqa' tosserva. Għadek qed tiċċassa lejh u għandu taħdita ma' sħabu. Tkompli tissendika mill-bogħod biex tara fuq xiex qed jitkellmu. Imbagħad jiftaħ ħalqu biex jitkellem, "Ija ta', that's exactly what I said last time infatti. It didn't make any sense during the lecture, jiġifieri. U jiena I told him..." Tkun qed tomgħod ir-wrap chewing gum li xtrajt, li sa ftit ħin qabel kienet l-itjeb wrap tad-dinja, (għalkemm fil-verità m'għandha ebda togħma) u li issa għandha togħma iktar qarsa minn dik ix-xamma tal-ħalib li kont insejt darba meta sifirt għal ħamest ijiem Londra u ġejt lura u sibt ġbejna f'tazza, b'naqra biċċiet ta' gallettini mwaħħda ġo fih li tfarrku u saru qishom il-bżar tal-ġbejna.

Illum narah u nkemmex xofftejja; mhux għax hu hekk, imma għax jien hekk u nintebaħ bil-marda patetika li qed ngħajjex lili nnifsi fiha. Kuntenta bil-gideb ta' gaġġa li bnejt lili nnifsi.

Ġibed

"Fejn tlaqna? Ejja mmorru sa Prestige!"

Ġbidt xi flus u għalkemm kont għajjiena mix-xogħol u mlaħalħa minn xi shots li ħadna m'għand Bellini ftit qabel, segwejt il-merħla ta' Bendu. Ġibditni ħabibti ġewwa. Dħalna u l-fawra ta' għeluq u riħa ta' sigaretti tas-soltu ħassejtha bdiet teħel mal-ħwejjeġ u mal-irquqija ta' kull xagħra fuq rasi. Tħoss xebgħa dlik jeħel ma' saqajk u nies geġwiġija timbotta. B'naq'a ta' slipper li għandek, tħoss il-ħġejjeġ imfarrka ta' tazzi mwaqqgħa li saru dħin fl-art u li issa saru parti mill-qiegħ taż-żarbun.

Onġi onġi onġella, il-folla timbotta. Min ġie? Min ġie? Min ġie? Wieħed jgħawweġ u jgerrem xufftejh. Tipprova tiċċara l-viżjoni mdallma titpeċpeċ ma' kull għafsa tad-dwal ipetpet u tara lil kulħadd jagħmel l-istess movimenti. Għajnejn jiċċassaw fil-baħħ ta' moħħ li qed jara x-xejn kollu. Xofftejn jiltaqgħu u jiġġieldu u jitgemmdu. Niftakar wieħed għaddej jiġbed ir-ritratti ta' dan kollu. Jaqbeż minn folla għal oħra. Tfal jiġbdu dagħwa b'Alla, ħerġin mit-toilets b'subgħajhom f'ħalqhom jogħrku. L-istess swaba' li għenuhom jegħlbu l-uġigħ tas-snien li kibrulhom ilbiraħtlula. Inkompli ndawwar ħarsti nimla aktar stampi mċajpra. Inkejja bil-fomm u bl-ilsien, kulħadd jiġbed sieq xulxin. Qabda u ġibda sesswali.

...

Id-DJ bis-sigarett f'ħalqu

Jidderiġi d-diski hu.

Sewwa sew f'nofs ta' diska,

Xi ħadd ħassu ħażin,

Ma kellux min idur miegħu,

Daru miegħu d-dubbien.

Agħmillu linja,

Agħmillu linja,

Agħmillu linja ħalli jtir.

"Tlaqna x'imkien ieħor?" Dawra durella biex niftehmu. Ċuċċu trejn biex noħorġu. Qabża żigarella. Nies jintelqu. Kulħadd ċoff. Ċoff tal-bellus. Jien stess nintelaq aktar bin-ngħas li ftit ftit beda jħallini. Morna mkien ieħor fin-naħa l-oħra ta' Paċevill. Għalkemm kont naf li hemm ġibda għall-post l-ieħor, bqajt miexja nsegwi, u b'xi mod, illum qomt f'soddti mhux f'sikkti.

Penti mdewweb

Penti /ˈpɛnti/ n.m. (pl. pentis): qalziet ta' taħt għall-irġiel, nisa jew tfal.

Qomt, għadni nofsni mhux f'tiegħi mil-lejl ta' qabel, għal-lekċer tad-disgħa. Inżilt ninħasel u tlajt fuq biex nara x'ħa nilbes. Ma kellix pentis komdi għal ma' ġins u niftakarni nara l-komdi fil-kamra ta' ħdejn il-veranda. Neħħejt ix-xugaman minn miegħi u qbadt wieħed u ndunajt li kien għadu ma nixifx. Kien hemm il-ħadida, xgħeltha u ħallejtha tisħon. Poġġejt il-penti fuq il-mogħdija u għaddejt il-penti ħalli jinxef u nkun nista' nużah. Qed naħseb fuq kemm se nħossu cosy cosy miegħi, iktar u iktar meta bdejt niksaħ mingħajr xejn imdawwar miegħi. Neħħejt il-ħadida minn fuq il-penti u kelli parti mill-penti mdewweb mal-ħadida. It-tikketta tgħid 92% poliamida 8% elastico. Hawn ukoll li nista' ngħaddih. Fottejt penti mill-komdi, madankollu lbistu u tgeddist f'aktar ħwejjeġ. Lezzjoni: darb'oħra nuża hairdryer.

Kejk taċ-ċikkulata mħarra

Ommi għandha l-birthdayn għada u bħalissa marru jaraw lin-nanna u jien spiċċajt waħdi d-dar. Ilħaqt xtrajt kejk miks, u xħin telqu bdejt inkewwes. Bajd, ħalib, marġerina u t-trab li xtrajt. Il-kejk kien qed jissajjar fil-forn wara li dellikt it-taġen biex ma jeħillix. Din li ma jeħillix ħadmet u xħin lesta qlajtu mingħajr ħafna problemi.

Jien belha u ridt li nitfa' l-icing li xtrajt fin-nofs tal-kejk minflok fuq, ħalli meta tigdem u jkun hemm dik it-togħma ta' icing taċ-ċikkulata ddub f'ħalqek li ma tkunx qed tistenna, il-kejk ikun iktar orgażmiku. Qsamtu min-nofs u ċaflast iċ-ċikkulata mal-biċċa li kelli fuq it-taġen. Dellikt. Ma qsamtux preċiżament min-nofs. Ridt indellek in-nofs l-ieħor u ndunajt li ma nkunx nista' nitfgħu fuq il-biċċa l-oħra sew, allura ħallejtha niexfa. Meta ġejt biex nagħmel il-biċċa l-oħra għal dik li kelli fuq it-taġen, indunajt li kelli bżonn krejn. Ġibt spatula u spatula oħra u qed nipprova nerġa' nagħlqu mingħajr ma jinqasamli. Ippruvajt inżommu b'idi u bdejt nitgħawweġ qisni ħaġa belha biex ma jinqasamx. Il-biċċa ta' fuq irnexxieli nqiegħdha fuq il-biċċa ta' taħt. Ma domtx wisq biex ninduna li kelli nneħħi idi minn bejn il-kejk. Ħriġt idi u kont qisni għadni kemm daħħaltha f'sorm ta' baqra. Ħarist lejn idi, stennejt din l-istampa titlaq minn moħħi, u ma stajtx. Xorta bqajt nimmaġinah poopie. Temmajt idi ma' ħalqi u lgħaqt.

Dan hu l-prodott finali li sabet il-mami. Bħalissa baqa' biss biċċa ċkejkna:

Rużar Briffa u Arnold

Ħa ngħidilkom storja. Ilbieraħ waqt lesson tal-Malti, Arny kien qed jitkellem fuq il-fażijiet tal-ħajja. "U x'inhi t-tfulija? Dak iż-żmien meta ma tagħtix kas u tgħix ħajja mingħajr problemi, u tilgħab biż-żibeġ. Imbagħad tibda ssir adult u tinduna li m'għandekx aktar dan il-ferħ. Mhux dak żmien? Tilgħab biż-żibeġ! U issa biex tilgħab?" Minn taħt l-ilsien smajt leħni nejjiek iwieġeb, "Biż-żibġa".